Amerikanyň Boeing korporasiýasy geçen ýylyň jemleýji hasabatyny Ýewropanyň Airbus konserni bilen bir wagtda diýen ýaly çap etdi. Hasabata görä, Boeing täze raýat uçarlary üçin 1 173 sany sargyt almagy başardy, Airbus-yň görkezijisi bolsa 1 000 töweregi sargyt bilen çäklenip galdy.
Şeýlelikde, Boeing 2018-nji ýyldan bäri ilkinji gezek satylan laýnerleriň sany boýunça özüniň esasy bäsdeşinden öňe geçmegi başardy.
Emma uçarlaryň hakyky eltilip berlişinde Airbus öňdeligini saklap gelýär. Ýylyň dowamynda ýewropaly öndüriji müşderilerine 793 uçar berdi, Boeing bolsa diňe 600 uçary eýelerine gowşurdy.
Ýatladyp geçsek, Boeing-iň satuwynyň pese gaçmagy 2018-nji we 2019-njy ýyllarda 737 Max uçarynyň gatnaşmagyndaky iki sany uly heläkçilikden soň başlandy. Mundan soňky barlaglar we uçuş çäklendirmeleri amerikan laýnerlerine bolan islegiň çürt-kesik azalmagyna getirdi. 2020-nji ýylda kompaniýa bary-ýogy 157 uçar iberip bildi, bu bolsa korporasiýanyň XXI asyrdaky iň pes görkezijisidir.
Şol wakalardan soň, Boeing ýolbaşçylaryny çalyşdy, pidalara uly möçberde öwez töleglerini (kompensasiýa) we döwlet gözegçilik edaralaryna jerimeleri töledi. 2021-nji ýyldan başlap, kompaniýanyň görkezijileri kem-kemden ýokarlanyp başlady. Airbus-yň satuw möçberleri hem artdy, emma Boeing krizisden (çökgünlikden) çykdygyça, ýewropaly öndürijiniň ösüş depgini haýallady.
