Bathyz döwlet tebigy goraghanasynda oturdylan fotoduzak öňki Aziýa alajabarsynyň ikinji bir wekilini we onuň çagasyny surata düşürdi. Alnan maglumatlar Türkmenistanyň günortasynda bu iň seýrek duş gelýän ýyrtyjynyň durnukly köpelýän toparynyň kemala gelendigine şaýatlyk edýär.
Suratlarda alajabarsyň çagasynyň enesiniň yzy bilen goraghananyň çäklerinde gezip ýörendigi görünýär. Nesilleriň yzygiderli hasaba alynmagy Bathyzyň alajabarslar üçin diňe bir aw meýdançasy däl-de, eýsem, hemişelik ýaşaýyş gurşawy bolup hyzmat edýändigini tassyklaýar.
Gözegçilik işleri Türkmenistanyň halkara "Conservation X Labs" guramasy bilen bilelikde durmuşa geçirýän seýrek süýdemdirijilere gözegçilik maksatnamasynyň çäklerinde alnyp barylýar.
Bathyz döwlet tebigy goraghanasy 1941-nji ýylda esaslandyryldy we Merkezi Aziýanyň iň möhüm goralýan tebigy çäkleriniň biri hasaplanýar. Goraghananyň çöketliklerden we pisse tokaýlyklaryndan ybarat bolan tebigy keşbi öňki Aziýa alajabarsy, garagulak, zolakly syrtlan we jeren ýaly seýrek haýwanlaryň ýaşamagy üçin örän amatlydyr. Fotoduzaklaryň maglumatlary hünärmenlere haýwanlaryň durmuşyna goşulmazdan, olaryň sanyna gözegçilik etmäge we tebigaty goramak boýunça görülýän çäreleriň netijeliligine baha bermäge mümkinçilik berýär.
