Kosmosa uçuş astronawtlaryň bedenine täsir edip, olaryň myşsalarynyň ýitmegine, süňk dykyzlygynyň peselmegine we suwuklyk hem elektrolit deňagramlylygynyň bozulmagyna getirýär. Emma bu-da hemmesi däl. Alymlar mikrograwitasiýanyň täsirlerini öwrenenlerinden soň, älem giňişligine uçuşyň astronawtlaryň beýnisiniň gurluşyna täsir edýändigini-de anykladylar.
Ýeriň üstünde grawitasiýa beýnini durnukly saklaýar we beýni-oňurga suwuklygy ony öçmekden goraýar. Grawitasiýanyň ýok ýerinde beýni ýokary süýşýär. Geçirilen täze seljerme şeýle ýagdaýda käbir ýeri gysylyp, käbir ýeri dartylan beýniniň deformasiýa sezewar bolýandygyny görkezdi.
Florida uniwersitetiniň Reýçel Zeýdleriň ýolbaşçylygyndaky alymlar topary 26 astronawtyň Halkara kosmos stansiýasyna uçuşynyň öňünden hem soňundan düşürilen MRT barlaglaryny, şeýle-de 60 günläp başaşak oturan 24 meýletinçiniň ýagdaýyny öwrendiler. Beýni üýtgeşmesi iki toparda hem ýüze çykaryldy, ýöne ol astronawtlaryňkyda has äşgär göründi. Üýtgeşme aýratyn hem kosmosda has köp wagt geçirenlerde ýiti duýuldy. Hatda ýylboýy uçuşda bolanlaryň beýnisiniň hereket gatlagynyň takmynan 2,5 mm süýşendigi belli boldy.
Şonuň ýaly-da, deformasiýanyň ýaýraýşy hem deň bolmady. Gysylma beýniniň hem ýokarky, hem arka böleklerine täsirini ýetirdi.
