Kompozitor Hans Zimmer «Iň gowy saz» baýragynyň gowşurylyşyny teleýaýlymda görkezmändikleri üçin «Altyn Globusyň» guramaçylaryny tankytlady. Deadline bilen söhbetdeşlikde Zimmer bu hereketiň nadanlyga çalym edýändigini-de ýaňzytdy.
Bu ýyl kino üçin iň gowy saz baýragyna «Günäliler» («Грешники») filmine ýazan sazy üçin şwesiýaly kompozitor Lýudwig Geransson mynasyp boldy. Ýöne nämüçindir ýaýlymda onuň baýrak alýan pursatyna derek mahabat arakesmesi görkezildi.
Zimmer wakanyň bolup geçen wagtynda zaldaky tomaşaçylaryň arasynda film döretmek işine we onda sazyň eýeleýän ornuna gowy düşünýän kinorežissýorlaryň oturandygyny-da belledi.
«Bu zal işiň hysyrdysyna kemsiz belet we men filmiň üstünde işläp, öýe gelenimde çagalarymyň meniň kimdigimi-de tanap bilmeýändigine, onuň bolsa, meniň ençe aýlap öýde bolmandygym sebäplidigine düşünýän kinorežissýorlardan doly. Kompozitoryň kino döretmekdäki orny şeýle bir möhüm welin, ol saz döretmäge başlan wagtynda režissýor eýýäm urşuň içinden geçip gelýär. Şu ýerde biziň ilkinji wezipämiz, oňa bu filmi aslynda näme maksat bilen döredýändigini ýatlatmak bolup durýar» diýip janykdy.
Wakanyň şeýle bolmagyna sebäpkär kişä näme diýjekdigi hakynda soralanda kompozitor: «Onuň bilen asla gürleşmezdim. Meniň pikirimçe, biziň bolanja dostlugymyz hem bozuldy» diýip jogap berdi.
Geransson «Delil» («Довод»), «Oppengeýmer» («Оппенгеймер»), «Gara babyr» («Черная Пантера») we «Wenom» («Веном») filmlerine döreden sazlary bilen tanalýar.
Zimmeriň özi-de şu ýyl Bred Pittiň baş keşbini janlandyran «F1» filmine ýazan sazy üçin «Iň gowy saz» baýragyna dalaşgär görkezilipdi.
