Birleşen Milletler Guramasynyň hasabatyna görä, 2026-njy ýylda dünýä ykdysadyýetiniň ösüşi 2025-nji ýyldaky 2,8%-den soň 2026-njy ýylda 2,7%-e çenli haýallar. Çaklamalara görä, 2027-nji ýylda ösüş 2,9% bolar, bu bolsa 2010 – 2019-njy ýyllar aralygyndaky ortaça 3,2% görkezijiden pesdir. Bu barada Reuters agentligi habar berýär.
Hasabatda 2025-nji ýylda ABŞ-nyň gümrük paçlary ýokarlandyrandygy, şol sebäpli global söwdada dartgynlylygyň ýüze çykandygy bellenilýär. Ýöne ýagdaýyň has uly söwda urşuna öwrülmeginiň öňüni almak başartdy, şonuň üçin dünýä söwdasyna ýeten ýitgi çäkli boldy.
BMG-niň Ykdysady we sosial meseleler boýunça departamentiniň hasabatynda nyrh zarbasyna garamazdan, ozalky üpjünçilikleriň we ätiýaçlyklaryň netijesinde, şeýle-de pul syýasatynyň ýeňilleşdirilýän we zähmet bazarynyň durnukly döwründe sarp edijileriň pul harçlamagy dowam etdirmegi bilen dünýä ykdysadyýetiniň durnuklylygy saklandygy aýdylýar.
BMG ykdysady syýasatyň mundan beýläk hem goldanylmagy gümrük paçlarynyň netijelerini gowşatmaga kömek eder diýip hasaplaýar. Şeýle-de bolsa, söwdanyň we işewürligiň ösüşi, ähtimal, haýallanar.
ABŞ-da ykdysady ösüş 2024-nji ýyldaky 2,8%-den soň 2025-nji ýylda 1,9%-e çenli haýallady we çaklamalara görä, döwlet çykdajylarynyň we ýeňil pul syýasatynyň netijesinde 2026-njy ýylda 2,0% we 2027-nji ýylda 2,2% bolar.
Hytaýda ösüşiň 2025-nji ýyldaky 4,9%-den soň 2026-njy ýylda 4,6% we 2027-nji ýylda 4,5% bolmagyna garaşylýar. Ýewropa Bileleşiginde durnukly sarp ediji çykdajylarynyň netijesinde ösüşiň 2026-njy ýylda 1,3% we 2027-nji ýylda 1,6% derejesinde bolmagy çaklanylýar.
Günorta Aziýada ösüş 2025-nji ýyldaky 5,9%-den soň 2026-njy ýylda 5,6%-e çenli haýallar we 2027-nji ýylda 5,9%-e gaýdyp geler. Hindistanda durnukly sarp edişiň we ABŞ-nyň ýokary paçlarynyň ýaramaz täsiriniň bellibir derejede öwezini dolmaly döwlet maýa goýumlarynyň netijesinde ösüşiň 2026-njy ýylda 6,6% we 2027-nji ýylda 6,7% bolmagyna garaşylýar.
