Las-Wegasda geçirilen CES 2026 halkara sergisinde Sony Honda Mobility (SHM) bilelikdäki kärhanasy özüniň ilkinji seriýaly elektromobili bolan Afeela 1-iň şu ýylyň ahyryna çenli ABŞ-da satuwa çykaryljakdygyny habar berdi. Satuwlar ilki Kaliforniýada başlap, 2027-nji ýylda Arizona we Ýaponiýa çenli giňär.
Bahasy takmynan 90 000 dollar boljak bu sedanyň satuwlaryna şu ýyl badalga berler.
Sergide kärhananyň ikinji modeli — ýerden beýikligi ýokarlandyrylan (krossower stilinde) täze prototip hem görkezildi. Bu model ABŞ bazaryna 2028-nji ýylda çykar.
Ulaglar diňe bir gatnaw serişdesi däl, eýsem "tekerli akylly enjam" hökmünde işlenip düzüldi:
Ulagyň elektron binýady Qualcomm Technologies tarapyndan üpjün ediler, daşky gurşawa bolsa Sony-niň ýokary takyklykly datçikleri gözegçilik eder.
Başlangyç tapgyrda L2+ derejeli awtonomlyk, geljekde bolsa doly diýen ýaly özbaşdak dolandyryş bolan L4 derejesine geçmek meýilleşdirilýär.
Multimedia ulgamy OpenAI we Microsoft Azure tehnologiýalaryna esaslanan şahsy kömekçi bilen enjamlaşdyrylar.
Sony-niň tejribesi ulagyň içinde wagtyňyzy gyzykly geçirmäge kömek eder:
- PlayStation 5: Ulagyň bort ulgamy arkaly PS5 oýunlaryny göni merkezi ekranda oýnap bolar.
- Web3 we Kripto: Kompaniýa kriptowalýuta sylaglary bolan täze mobil hyzmatlaryny we açyk programma üpjünçiligi platformasyny ornaşdyrmagy meýilleşdirýär.
Awtoulaglar Honda-nyň ABŞ-nyň Ogaýo ştatyndaky zawodynda öndüriler.
