Amerikanyň Birleşen Ştatlarynyň Prezidenti Donald Tramp Türkmenistanyň Prezidenti Serdar Berdimuhamedowy Täze ýyl baýramy bilen gutlady.
Gutlag hatynyň tekstini TDH döwlet habarlar agentligi çap etdi.
«Roždestwo we Täze ýyl baýramyňyz gutly bolsun!» diýlip hatda bellenilýär.
Belläp geçsek, iki döwletiň baştutanlary geçen ýylyň 6-njy noýabrynda Waşingtonda geçirilen «Merkezi Aziýa + ABŞ» sammitiniň çäginde duşuşypdylar. Şol duşuşygyň netijeleri boýunça Türkmenistanyň, Gazagystanyň, Gyrgyzystanyň, Özbegistanyň, Täjigistanyň we ABŞ-nyň hökümetleriniň arasynda Ykdysady hyzmatdaşlyk boýunça meýilnamalar baradaky Beýannama we Medeni miras boýunça meýilnamalar baradaky Beýannama gol çekilipdi.
Türkmenistanyň Prezidentine Täze ýyl gutlaglaryny, şeýle hem Hytaý Halk Respublikasynyň Başlygy Si Szinpin, Russiýa Federasiýasynyň Prezidenti Wladimir Putin we dünýäniň beýleki köp sanly döwletleriniň baştutanlary ugratdylar.
