Fransiýanyň Wann şäherindäki “Lagors” (Lagorce) myhmanhanasynyň aşagyndan arheologlar 1380-nji ýyllarda Breton gersogy Žan IV tarapyndan gurlan Şato-de-l'Ermin (Château de l'Hermine) köşgüniň galyndylaryny ýüze çykardylar. 2023-nji ýylda başlanan gazuw-agtaryş işleri netijesinde, galanyň diwarlarynyň ajaýyp ýagdaýda saklanyp galandygy we orta asyr durmuşyna degişli köp sanly jikme-jiklikler mälim boldy.
Fransiýanyň Öňüni alyş arheologiýa barlaglary boýunça milli institutynyň (INRAP) hünärmenleri 42x17 metr ölçegdäki gersog rezidensiýasynyň adatdan daşary galyň diwarlarynyň bolandygyny we onuň daşynyň ýörite gorag hendiği bilen gurşalandygyny habar berdiler.
3-4 gatly bina hatda öz döwrüniň ösen hajathana we suw akdyryjy ulgamlary bilen üpjün edilipdir. Barlagçylar binanyň dabaraly basgançagyny, onuň bezegli binýadyny we penjire gyralaryndaky ýörite daş oturgyçlary tapdylar.
Galanyň içinden XV-XVI asyrlara degişli ýüzlerçe tapyndy — teňňeler, şaý-sepler, aşhana enjamlary, agaç çanaklar we çelek bölekleri çykaryldy. Hünärmenler gurluşygyň örän gysga wagtda we ýokary hilli ýerine ýetirilendigini belleýärler. "Žan IV öz döwrüniň iň ökde inženerlerini we ussalaryny töweregine jemlemegi başarypdyr" diýip, ekspertler nygtaýarlar.
Şato-de-l'Ermin takmynan bir asyrlap gersogyň esasy rezidensiýasy bolup hyzmat edipdir. Emma 1470-nji ýyllarda Fransisk II-niň döwründe gersog köşgüniň Nant şäherine göçürilmegi bilen, gala öňki ähmiýetini ýitiripdir we XVIII asyra çenli doly terk edilipdir.
