9-njy ýanwarda FAW Toyota bilelikdäki kärhanasy altynjy nesil Toyota RAV4 XA60 krossowerini hytaý bazaryna ibermäge başlar. Model täzelenen daşky görnüşe, gaýtadan işlenen interýere we güýç enjamynyň üç görnüşine – arassa benzine we iki gibride eýe boldy.
Awtoulag 169 800-den 228 800 ýuan aralygynda (takmynan, 24,3 müň dollardan 32,7 müň dollara çenli) satylýar. Ilkinji alyjylar üçin arzanladylan başlangyç baha – 151 800 ýuan (takmynan, 21,7 müň dollar) göz öňünde tutuldy.
Toyota RAV4 XA60 krossoweri C şekilli faralara, «howada gaýýan» üçek effektine, gara tigir disklerine we yzky çyralary birleşdirýän yşyk zolagyna eýe boldy. Awtomobiliň göwrümi 4620×1855×1680 mm barabar.
Krossoweriň salonynda üç ekran bolup, olaryň arasynda proeksion displeý we 15,6 dýuýmlyk multimedia ekrany bar. 256 reňkden saýlamak mümkinçiligi bilen atmosfera yşyklandyryşy hem göz öňünde tutuldy. Şeýle-de, model 4.0 wersiýada Toyota Safety Sense kömekçi toplumy bilen üpjün edildi.
Esasy wersiýa 171 at güýjüni berýän 2,0 litrlik atmosfera benzin hereketlendirijisi bilen enjamlaşdyrylýar. Gibrid wersiýalar 152 we 185 at güýjüni berýän 2,0 we 2,5 litrlik hereketlendirijiler bilen hödürlenýär. Iň ýokary wersiýada doly herekete getiriji ulgam elýeterlidir.
