Amerikaly aýdymçy Beýonse Noulz-Karter dollar milliarderi boldy. Forbes žurnalynyň maglumatlaryna görä, ol baýlygy bir milliard dollardan geçen bäşinji sazanda boldy.
Ozal bu sanawa onuň adamsy – repçi Jay-Z, aýdymçylar Teýlor Swift we Rianna, şeýle-de Brýus Springstin girýärdi. Umuman, Forbes-iň milliarderler reýtinginde güýmenje-dynç alyş pudagynyň 22 wekili bar.
Beýonse girdejisiniň esli bölegini gastrollar arkaly gazandy. 2023-nji ýylda Renaissance albomynyň goldawyna geçirilen konsert syýahaty tas 600 mln dollar ýygnady. Cowboy Carter albomy bilen 2025-nji ýyldaky syýahat hem oňa petek satuwyndan 400 mln dollardan gowrak girdeji, şeýle-de konsertlerde ýadygärlik sowgatlyklarynyň satuwyndan, takmynan, 50 mln dollar getirdi.
Aýdymçynyň biznes taslamalary: saçlara ideg etmek boýunça Cécred brendi, SirDavis markasy we 2024-nji ýylda işini bes eden Ivy Park egin-eşik hatary hem goşmaça girdejileri üpjün etdi. Şeýle-de bolsa, Beýonseniň baýlygynyň esasy bölegi aýdym-saz işi bilen baglanyşyklydyr.
Beýonse dünýäde iň köp gyzyklanma bildirilýän aýdymçylaryň hataryna girýär we «Gremmi» baýragynyň taryhynda iň köp baýrak alan artist hasaplanýar. Onuň 35 baýragy bar. 2024-nji ýylda ol Cowboy Carter albomy üçin «Iň gowy albom» kategoriýasynda ilkinji gezek «Gremmi» aldy.
