«Forbes» neşiri dünýäniň iň baý adamlarynyň ýyllyk sanawyny hödürledi. Täzelenen reýtingde birinji orny yzygider ikinji ýyl telekeçi Ilon Mask eýeledi.
«Tesla» we «SpaceX» kompaniýalarynyň esaslandyryjysy hem-de «X» sosial ulgamynyň eýesi bolan Maskyň kapitaly 839 milliard dollara ýetdi. Fewral aýynyň başynda SpaceX kompaniýasynyň telekeçiniň xAI emeli aň startapy bilen birleşmeginden soň, Mask baýlygy 800 milliard dollardan geçen dünýäde ilkinji adam boldy.
Sanawda ikinji orny 257 milliard dollar bilen Google-yň egindeş esaslandyryjysy Larri Peýj eýeleýär. Şeýlelikde, Maskyň ondan aratapawudy 500 milliard dollardan hem gowrakdyr. Üçünji orny bolsa 237 milliard dollar baýlygy bilen Google-yň ýene bir esaslandyryjysy Sergeý Brin eýeledi.
Olaryň yzyndan Amazon-yň esaslandyryjysy Jeff Bezos (224 milliard dollar) gelýär, ilkinji bäşligi bolsa 222 milliard dollar bilen Meta kompaniýasynyň eýesi Mark Sukerberg jemleýär.
«Geçen ýylyň dowamynda ilatyň maddy hal-ýagdaýy görlüp-eşidilmedik derejede ýokarlandy, sebäbi baýlar haýran galdyryjy tizlik bilen has-da baýamagyny dowam edýär. Bu ýylky sanawda 3428 sany milliarder bar, bu bolsa geçen ýylkydan 400 adam köpdür we 1987-nji ýylda sanaw döredilenden bäri iň ýokary görkezijidir» – diýlip, makalada bellenilýär.
Dünýäniň iň baý adamlarynyň umumy baýlygy bir ýyl öňki 16,1 trillion dollar bilen deňeşdirilende, rekord derejä — 20,1 trillion dollara ýetdi. Sanawyň ilkinji onlugynyň umumy baýlygy 2,6 trillion dollar diýlip hasaplanýar. Mundan başga-da, baýlygy 100 milliard dollardan geçýän adamlaryň sany hem rekord derejä — 20-ä ýetdi.
Şu ýyl «Forbesiň» milliarderler sanawyna 390 sany täze adam goşuldy, olaryň arasynda Maskyň dogany Kimbal, repçi we prodýuser Dr.Dre (asyl ady Andre Ýang), aýdymçy Beýonse Noulz-Karter we tennisçi Rojer Federer bar. Sanawdan 89 adam, şol sanda NASA-nyň ýolbaşçysy Jared Aýzekman çykaryldy.
