«Haýwanlar şäheri-2» multfilminiň režissýorlary Baýron Howard we Jared Buş animasion filmiň üçünji bölümi üçin pikir gözlegine çykdy. Olar multfilmiň önümçiliginiň dokuz ýyl töweregi wagt aljakdygyny aýdýar (birinji bilen ikinji bölümiň arasyndaky wagt hem şonça bolupdy).
Taslama barada režissýorlar Weibo platformasynda sorag-jogap sessiýasynyň dowamynda habar berdi diýip, Sina portaly belleýär. Jared Buş multfilmi döretmegiň, adatça, 4-5 ýyl wagt alýandygyny, ilkinji iki-üç ýylyň bolsa konsepsiýany we ssenarini taýýarlamaga sarp edilýändigini belledi.
«Biz Baýron bilen pikirleri öwrenmegi we “oýnamagy” örän gowy görýäris. Üns beren bolsaňyz, biz “Haýwanlar şäheri-2-niň” finalynda birnäçe yşaratlary goşduk. Mysal üçin, ol ýerde guş ýelegi peýda bolýar we bu biziň özümizi oýlanmak üçin gyzyklandyrýan zat» — diýip, Jared Buş aýtdy.
Awtorlar pişikleriň, itleriň we beýleki öý haýwanlarynyň bolmazlygyny olary eldekileşdirip biljek adamlaryň ýokdugy bilen düşündirdi. Şol sebäpli franşizada şimpanze, gorilla we beýleki primatlar hem görkezilmedi. Ýöne Afrikadaky ýaly ýabany it görnüşleri bar.
Howard «Haýwanlar şäheri+-yň» döreden gyzyklanmasyny göz öňünde tutup, franşizada spin-offlaryň peýda bolup biljekdigini hem inkär etmedi.
«Haýwanlar şäheri-2» 26-njy noýabrda giň prokata çykdy we ilkinji 17 günde 1 mlrd dollardan gowrak ýygnap, golliwud animasiýasy üçin rekord goýdy. Multfilmiň girdeji ýygymy eýýäm 1,29 mlrd dollara ýetdi.
