Şweýsariýanyň Sýurih federal tehnologiýa institutynyň (ETH Zurich) alymlary skat balygynyň hereketlerini gaýtalap bilýän, simsiz işleýän Stingraybot atly kiçijik roboty işläp taýýarladylar. Enjamyň ini takmynan 4 santimetr bolup, ol lukmançylyk barlaglary we hassalary hirurgiki däl usulda bejermek üçin niýetlenendir diýip, New Atlas neşiri habar berýär.
Apparat daşarky ultrases tolkunlary arkaly uzakdan dolandyrylýar. Bu bolsa oňa batareýasyz, motorsyz we kabelsiz işlemäge mümkinçilik berýär. Gurluşyň esasy binýady — ýüzgüçlerdäki «myşsalaryň» wezipesini ýerine ýetirýän, ölçegi 12–66 mikron bolan öýjükli inçe silikon membranalardyr. Suwuklyga çümdürilende, bu öýjükler üstki dartylma güýji arkaly howa mikroköpürjiklerini saklap galýarlar.
Ultrasesiň täsiri astynda köpürjikler titreýär we sanlyja millisekuntlaryň içinde membrananyň gysylmagyna sebäp bolýar. Dürli diametrli öýjükleriň ulanylmagy netijesinde, robot diri organizmlere mahsus bolan tolkun şekilli hereketleri edip bilýär.
Synag wagtynda Stingraybot balyk çogdamlaryny tutup bildi, çylşyrymly üstlerde we içege ýollarynyň modelinde bökdençsiz hereket etdi. Geljekde bu robotyň dermanlary adam bedeniniň içindäki anyk nokada eltip, hirurgiki amalyýetsiz ýerleşdirmegi meýilleşdirilýär.
