Lexus kompaniýasy RZ elektrik krossowerleriniň hataryny täze flagman model — 600e F Sport Performance bilen giňeltdi. Bu awtoulag öz maşgalasynda iň kuwwatly güýç beriji gurluş bilen üpjün edilip, bary-ýogy 4,4 sekuntda 100 km/sag tizlige ýetmäge mümkinçilik berýär.
Bu modifikasiýa her biri 227 at güýjüne eýe bolan iki sany elektrik hereketlendirijisi bilen üpjün edilen bolup, ulgamyň umumy kuwwaty 425,5 at güýjüne deňdir. Elektromobil 77 kWt/sag sygymly dartyş batareýasy bilen üpjün edilen we bir gezekki zarýad bilen 525 kilometre çenli ýol geçip bilýär.
Tehniki üýtgeşmeler awtoulagyň hereket ediji bölegine hem girizildi: ýerden bolan beýikligi (klirensi) 20 millimetr azaldyldy, 21 dýuýmlyk Enkei diskleri oturdyldy we tormoz ulgamy alty porşenli supportlar bilen güýçlendirildi. Modeliň daşky keşbi eksklýuziw karbon (uglerod süýümli) detallary bilen tapawutlanýar. Onuň düzümine splitterler, nakladkalar, iki sany yzky ganat (anti-wing) we uglerod süýümli üçek girýär. Dizaýn RZ 450e F Sport Performance modelindäki ýaly gök reňkli bezegler bilen baýlaşdyrylan.
Awtoulagyň salony täze dizaýnly bezegler we öň oturgyçlaryň ýörite örtükleri bilen tapawutlanýar.
Ýaponiýada satuwlaryň 2-nji martda başlamagyna garaşylýar. Awtoulagyň bahasy 12 165 000 ýenadan (takmynan 78 000 dollar) başlaýar.
