«Emmi» baýragynyň eýesi, belli režissýor Ýohan Renk («Çernobyl», «Kosmonawt») meşhur Assassin’s Creed wideo oýnunyň esasynda düşüriljek täze serialyň režissýory bolar. Bu barada Variety neşiri habar berýär.
Serial Netflix platformasynda görkeziler. Esasy keşpleri aktýorlar Tobi Uolles we Lola Pettikrýu janlandyrarlar. Robert Patino («Ýabany Günbataryň dünýäsi») we Dewid Uiner («Halo») bolsa taslamanyň şourannerleri (baş prodýuserleri we ssenariçileri) hökmünde çykyş ederler.
Assassin's Creed oýnunyň ilkinji bölümi 2007-nji ýylda çykaryldy. Eseriň sýužet liniýasy dürli gymmatlyklary we dünýägaraşlary goraýan assasinler bilen tampliýerleriň arasyndaky asyrlara çekýän gapma-garşylygyň töwereginde gurulýar.
Belläp geçsek, 2016-njy ýylda bu oýnuň esasynda baş keşbi Maýkl Fassbenderiň janlandyrmagynda doly metražly çeper film hem surata düşürilipdi.
