25-nji dekabrda Aşgabatdaky “Mekan” köşgünde Türkmenistanyň Halk Maslahatynyň guramagynda “Halkara parahatçylyk we ynanyşmak ýyly: Bitarap Türkmenistanyň ynamly gadamlary” atly dabara geçirildi. Oňa Hökümet agzalary, ýurdumyzyň diplomatik gullugynyň, daşary döwletleriň we halkara guramalaryň Aşgabatdaky diplomatik wekilhanalarynyň ýolbaşçylarydyr wekilleri, dürli pudaklarda zähmet çekýän raýatlar, ýaşlar gatnaşdylar.
Türkmenistanyň Halk Maslahatynyň Diwanynyň iş dolandyryjysy R.Bazarow açdy.
Soňra Türkmenistanyň wise-premýeri, daşary işler ministri R.Meredow çykyş edip, 2025-nji ýylyň Türkmenistanyň taryhynda, onuň döwletlilik ýörelgeleriniň, syýasy, ykdysady, durmuş ösüşiniň pugtalanmagynda möhüm tapgyr bolandygyny belledi. 2025-nji ýyl ýurdumyzyň içeri we daşary syýasatynda gazanylan uly üstünlikler, ýetilen belent sepgitler barada belläp geçdi.
Bellenilişi ýaly, 2025-nji ýylda Türkmenistan «Merkezi Aziýa +» dialogynyň işine-de netijeli gatnaşdy. Olaryň çäklerinde Hytaý Halk Respublikasy, Russiýa Federasiýasy, Amerikanyň Birleşen Ştatlary, Ýaponiýa, Ýewropa Bileleşigi, Italiýa Respublikasy ýaly ýurtlar bilen duşuşyklar geçirildi.
2025-nji ýylda ýokary derejedäki ikitaraplaýyn gatnaşyklar hem-de özara saparlar işjeň dowam etdi. Şunuň bilen baglylykda, şu ýylyň dowamynda hormatly Prezidentimiziň daşary ýurtlara döwlet, resmi we iş saparlarynyň 15-sini amala aşyrandygy, Gahryman Arkadagymyzyň hem 9 ýurtda saparda bolandygy, şol bir wagtda daşary ýurtlaryň döwlet we hökümet Baştutanlarynyň Türkmenistana saparlarynyň 31-siniň guralandygy aýdyldy.
Türkmenistanyň Birleşen Milletler Guramasynyň ýanyndaky hemişelik wekili, Türkmenistanyň Gahrymany A.Ataýewa 2025-nji ýylyň dowamynda sebit we ählumumy derejede parahatçylygy, ynanyşmagy pugtalandyrmaga gönükdirilen köp sanly halkara ähmiýetli maslahatlaryň, ýokary derejeli forumlaryň we duşuşyklaryň guralandygyny, ählumumy howpsuzlygy pugtalandyrmaga gönükdirilen başlangyçlaryň üstünlikli durmuşa geçirilendigini belledi.
Dabaranyň barşynda şeýle hem BMG-niň Çagalar gaznasynyň Türkmenistandaky wekili Jalpa Ratna, Amerikanyň Birleşen Ştatlarynyň Türkmenistandaky ilçisi Elizabet Rud, Germaniýa Federatiw Respublikasynyň ilçisi Bernd Haýns, Özbegistanyň ilçisi Rawşanbek Alimow, Eýran Yslam Respublikasynyň ilçisi Ali Mojtaba Ruzbehani çykyş etdiler.
Mundan başga-da, Mary welaýatynyň Wekilbazar etrabynyň ýaşaýjysy B.Hojaberdiýew, Halkara ynsanperwer ylymlary we ösüş uniwersitetiniň mugallymy Ç.Wekilowa, Türkmenistanyň Daşary işler ministrliginiň Halkara gatnaşyklary institutynyň talyby O.Sähetmyradow dagy çykyş etdi.
Çäräniň barşynda daşary ýurt döwletleriniň we halkara guramalaryň Türkmenistandaky diplomatik wekilhanalarynyň ýolbaşçylaryny hem-de ýurdumyzyň raýatlaryny «Türkmenistanyň Bitaraplygynyň 30 ýyllygyna» atly Türkmenistanyň ýubileý medaly hem-de ýadygärlik kümüş nyşany bilen sylaglamak dabarasy boldy.
