Rimac kompaniýasy ýokary öndürijilikli Nevera R giperkarynyň eksklýuziw nusgasyny — Founder's Edition wersiýasyny tanyşdyrdy. Şeýle awtoulaglaryň bary-ýogy 10-sy öndüriler we olaryň hemmesi eýýäm brendiň muşdaklarynyň arasynda paýlanyldy. Awtoulag eýeleri ulag bilen birlikde birnäçe ýörite artykmaçlyklara, şol sanda Rimac-yň baş edarasyna erkin girmäge mümkinçilik berýän açar-karta eýe bolarlar.
Founder's Edition-yň esasy aýratynlygy onuň özboluşly dizaýnydyr. Kupeniň kuzowy geometrik aýratynlyklaryna laýyklykda iki reňkde boýalar, daşky nagşy bolsa ýokary tehnologiýalara salgylanar. Salony hem iki reňkli bezegde bolar: sürüji we ýolagçy oturgyçlarynyň aýratynlykda bezelmegi (kontrast) Mate Rimasyň şahsy awtoulagyndan alnan. Bezegleriň arasyna kompaniýanyň taryhynyň esasy tapgyrlaryna yşarat edýän gizlin nyşanlar hem ýerleşdiriler.
Şeýle-de, alyjylara awtoulagyň ähli aýratynlyklaryny öz isleglerine görä (individual) sazlamagyň giň mümkinçilikleri wada berilýär.
Awtoulagdan we baş edara girmek hukugyndan başga-da, ulag eýeleri Rimac kompaniýasynyň strategiýasyny we geljekki barlaglaryny ara alyp maslahatlaşmaga çagyrylar. Şeýle hem olar görkezişlere, rekord goýýan ýaryşlara we täze modelleriň ýapyk tanyşdyrylyşlaryna gatnaşyp bilerler. Kompaniýa hödürlenýän käbir bonuslary syr saklamagy makul bildi.
Rimac Nevera R Founder's Edition jemi kuwwaty 2017 at güýjüne deň bolan dört sany elektrik hereketlendirijisi bilen üpjün edilen. Giperkar sagatda 96 km tizlige bary-ýogy 1,66 sekuntda ýetýär, onuň iň ýokary tizligi bolsa sagatda 431,45 km-e deňdir.
