20-nji dekabrda ýurdumyzyň zähmetde tapawutlanan raýatlaryna “Türkmenistanyň Bitaraplygynyň 30 ýyllygyna” atly Türkmenistanyň ýubileý medalyny, şeýle hem “Türkmenistanyň hemişelik Bitaraplygynyň 30 ýyllygy” atly ýadygärlik altyn we kümüş nyşanlaryny gowşurmak dabaralary geçirildi. Bu barada TDH habar berýär.
Halkara parahatçylyk we ynanyşmak ýylyna, Halkara Bitaraplyk gününe, Türkmenistanyň hemişelik Bitaraplyk hukuk derejesine eýe bolmagynyň 30 ýyllygyna bagyşlanan çäreler giň gerimli aýdym-sazly dabaralar bilen dowam etdi.
Dabaralaryň dowamynda bellenilişi ýaly, raýatlaryň uly toparynyň “Türkmenistanyň Bitaraplygynyň 30 ýyllygyna” atly Türkmenistanyň ýubileý medaly we ýadygärlik nyşanlary bilen sylaglanylmagy döwletimiziň olaryň uzak ýyllaryň dowamynda çeken tutanýerli hem-de netijeli zähmetine ýokary baha berýändiginiň aýdyň güwäsidir.
Ýokary sylaglara mynasyp bolan ildeşlerimiz özleriniň döredijilikli işlemegi ugrunda döredilýän hemmetaraplaýyn mümkinçilikler, döwlet derejesinde berilýän goldaw üçin tüýs ýürekden hoşallyklaryny beýan edip, geljekde hem Watanymyzyň ýeten belent sepgitlerini wagyz etmäge, oňyn halkara başlangyçlaryny ilerletmäge mynasyp goşant goşjakdyklaryna ynandyrdylar.
