Germaniýanyň Nýurnberg şäherinden Ýozef Kardinal 11 müň garly şardan ybarat kolleksiýanyň eýesi hökmünde resmi taýdan Ginnesiň rekordlar kitabyna girizildi. Tutuş kolleksiýa rekord eýesiniň öýündäki tekjelerde we witrinalarda ýerleşýär.
Ýozef Kardinal şeýle şarlary ýygnamaga 1984-nji ýylda ilkinji sowgat edilen şardan başlady.
«Dostlarym meniň üçin olary yzygiderli satyn alýardy we bir pursatda men pikir etdim: näme üçin olary özüm satyn almaly däl?» — diýip, kolleksioner ýatlaýar. Şondan bäri ol aýaly bilen bilelikdäki gezelençleriň dowamynda kolleksiýasynyň üstüni ýetirdi.
Kolleksiýa temençe görnüşindäki kiçijik şarlardan başlap, Kardinalyň boýundan geçýäne çenli dürli hili şarlary öz içine alýar. Eksponatlaryň arasynda «Garri Potteriň», «Ýyldyz söweşleriniň» we hatda gark bolup barýan «Titanigiň» stilindäki tematiki şarlar we Coca-Cola telefonynyň stilinde şar bar. Olardan iň gadymysy 1889-njy ýylda Parižde ýasalan Eýfel diňli aýna şardyr.
«Adamlar garly şarlary gowy görýär, sebäbi olar ideal dünýäni görkezýär. Belki, hakyky bolmadyk dünýäni, hut şonuň üçin olar bizi özüne çekýär» — diýip, Ýozef Kardinal belleýär.
Kolleksiýanyň gyş bilen baglydygyna garamazdan, rekord eýesiniň özi güneşli howany gowy görýär. «Nýurnbergde gar kän ýagmaýar, şonuň üçin men köp gary öz şarlarymda görýärin» — diýip, ol ýylgyrmak bilen aýdýar.
