Jeýms Kemeronyň «Awatar: Ot we kül» filminiň global premýerasy boldy. Film 18-nji dekabrda Ýewropanyň we GDA-nyň köp ýurtlarynda, şeýle-de Hytaý, Beýik Britaniýa, Ýaponiýa, Ispaniýa, Hindistan, Fransiýa, Germaniýa, Italiýa we Koreýa ýaly esasy bazarlarda prokata çykdy. Filmiň Demirgazyk Amerikada relizi 19-njy dekabrda boldy diýip, Deadline ýazýar.
Filmiň ilkinji uikendde dünýä boýunça 340–380 mln dollar ýygnamagyna garaşylýar. Bu görkeziji franşizanyň 2022-nji ýylda degişli döwürde 444 mln dollar ýygnan «Awatar: Suwuň ýoly» bölüminiň netijesinden pesdir. Halkara prokatda filmiň 250–275 mln dollar, ABŞ-da 90 mln dollardan gowrak ýygnamagyna garaşylýar.
Üçünji «Awatar» 2025-nji ýylda «Haýwanlar şäheri 2» multfilminden soň ilkinji girdejileri boýunça ikinji orny eýeläp biler.
Filmiň sýužeti wulkanlaryň golaýynda ýaşaýan Na’wi urugyna ünsi jemleýär. Bu bölümde esasy gürrüň berijiniň keşbi Jeýk Salliden ogly Loaka geçdi. Öz rollaryna Sem Uortington, Zoi Saldana, Keýt Uinslet we Sigurni Uiwer gaýdyp geldi.
Tankytçylar Jeýms Kemeronyň täze filmine öňki bölümlerden pes baha berdi. Rotten Tomatoes saýtynda onuň reýtingi 67% boldy.
Syn berijiler filmiň wizual keşbiniň ýokary derejededigini, ýöne sýužet öwrümleriniň gaýtalanýandygyny we täze bir zady goşmaýandygyny belleýär.
Häzirki wagtda önümçilikde franşizanyň ýene iki bölümi bar. Olaryň çykmagy 2029-njy we 2031-nji ýyllaryň dekabryna meýilleşdirilýär.
