Ford kompaniýasy elektrik awtoulaglarynyň birnäçe modeliniň önümçiligini bes edýändigini we 19,5 milliard dollarlyk aktiwlerini hasapdan aýyrýandygyny yglan etdi. Bloomberg-iň habar bermegine görä, awtoulag öndürijisi elektrikleşdirme syýasatyny düýpli gözden geçirýär we öň meýilleşdirilen birnäçe taslamadan dänýär.
Täze strategiýanyň çäginde Ford kompaniýasy LG Energy Solution bilen baglaşan 6,5 milliard dollarlyk şertnamasyny ýatyrdy. Bu ylalaşyk 2027-nji ýyldan 2032-nji ýyla çenli akkumulýator üpjünçiligini göz öňünde tutýardy. Bu ädim LG-niň maliýe görkezijilerine düýpli täsir eder, sebäbi şertnamanyň göwrümi üpjünçiniň ýyllyk girdejisiniň tas 30%-ine deňdir.
Resmi beýanata görä, kompaniýa doly elektrikli F-150 Lightning pikabynyň ornuna ýöreýiş aralygy artdyrylan täze modeli hödürleýär. Täze modifikasiýa gibrid bolup, onda benzinli hereketlendiriji diňe batareýany zarýadlamak üçin ulanylar.
Mundan başga-da, kompaniýanyň ýolbaşçy düzümi "T3" kod ady bilen meşhur bolan täze nesil elektrikli ýük awtoulagynyň işlenip düzülmeginden we meýilleşdirilen elektrikli täjirçilik furgonlarynyň önümçiliginden ýüz öwürmek barada karar kabul etdi.
