Prime Video režissýor Gaý Riçiniň «Ýaş Şerlok» serialynyň ilkinji tizer-treýlerini hödürledi. Şeýle-de, striming taslamanyň sekiz bölüminiň ählisiniň 4-nji martda elýeterli boljakdygyny habar berdi.
Sýužet 1870-nji ýyllarda Oksfordda ýaýbaňlanýar we Şerlok Holmsyň durmuşynyň irki ýyllaryna bagyşlanýar. Wakanyň merkezinde özüniň ilkinji derňew işiniň başyna geçýän ýiti häsiýetli we pitneçi garaýyşly ýetginjek durýar. Ol ölüm bilen bagly işiň üstünde işleýän wagty ykbalyna täsir etjek halkara dildüwşügiň üstünden barýar.
19 ýaşly detektiwiň keşbini «Soň» (После) melodramasynyň ýyldyzy Hiro Faýns-Tiffin ýerine ýetirdi. Şeýle-de, aktýorlar düzümine Donal Finn, Sen Szine, Jozef Faýns, Nataşa MakElhon, Maks Aýrons we Kolin Fýort girdi.
Taslama Endrýu Leýniň meşhur detektiwiň kemala gelşine bagyşlanýan spin-off kitaplaryna esaslanýar. Gaý Riçi serialyň ilkinji iki bölümini düşürdi we ýerine ýetiriji prodýuser bolup çykyş etdi.
Režissýor üçin bu Şerlok Holmsyň dünýäsine ilkinji gezek ýüzlenmegi däl. Ozal ol «Şerlok Holms» (2009) we «Şerlok Holms: Kölegeleriň oýny» (2011) filmlerini düşürdi. Olarda baş keşpleri Robert Dauni-kiçi (Şerlok) we Jud Lou (doktor Watson) ýerine ýetirdi.
