TikTok öz amerikan bölümçesini amerikan maýadarlary tarapyndan dolandyrylýan bilelikdäki kärhana satmak barada şertnama gol çekdi. Alyjylaryň düzümine Oracle korporasiýasy, Silver Lake we MGX kompaniýalary girdi diýip, TikTok-yň baş direktory Şou Szy Çuwuň içerki resminamasyna salgylanyp, Axios we Bloomberg ýazýar.
Karara laýyklykda, şertnamany 2026-njy ýylyň 22-nji ýanwarynda gutarnykly ýapmak meýilleşdirilýär.
Bu ädim milli howpsuzlyk üçin töwekgelçilikleri aradan aýyrmak maksady bilen hytaý kompaniýasy ByteDance-den aktiwleri almak prosesini tamamlaýar. Şertnama ýapylandan soň, TikTok US Data Security bölümçesiniň esasynda döredilen täze bilelikdäki kärhana garaşsyz ýuridik şahs statusyny alar. Gurama maglumatlaryň saklanmagyna, algoritmleriň howpsuzlygyna, kontent moderasiýasyna we programma üpjünçiligine jogap berer.
Ýatlap geçsek, 25-nji sentýabrda ABŞ-nyň Prezidenti platformanyň üstünden gözegçiligi amerikan korporasiýalaryna geçirmek barada permana gol çekdi. Kompaniýa 14 mlrd dollar bilen bahalandyryldy. Ozal ABŞ-da sosial ulgama gatnaşykda eýesini çalyşmak talaplary bilen baglanyşykly kanuny çäklendirmeler hereket edýärdi.
Belläp geçsek, Hytaýda programmanyň Douyin ady bilen öz wersiýasy hereket edýär, TikTok-yň halkara wersiýasy bolsa elýeterli däl.
