Baku 2026-njy ýyl üçin «Dünýäniň sport paýtagty» statusyna mynasyp boldy. Degişli çözgüt Ýewropanyň sport paýtagtlarynyň we şäherleriniň federasiýasy (ACES) tarapyndan kabul edildi diýip, AzerTaj agentligi habar berýär.
Azerbaýjanyň paýtagty bu tituly Monakodan kabul edip aldy.
Bakuwda «Dünýäniň sport paýtagtlary» ýadygärlik tagtasyna resmi gol çekmek dabarasy geçirildi. Çärä resmi adamlar we ACES-iň wekilleri gatnaşdy. Guramanyň prezidenti Jan Françesko Lupatelli Bakuwyň hemişe sport ösüşinde öňdebaryjylaryň hatarynda bolandygyny we sport infrastrukturasynyň ýokary hili bilen tapawutlanýandygyny belledi.
ACES Brýusselde ştab-kwartirasy bolan täjirçilik däl assosiasiýadyr. Gurama her ýyl sport paýtagtlaryny saýlap, dürli yklymlardaky şäherlere ýörite baýraklary berýär. Assosiasiýa ÝUNESKO-nyň, şeýle-de Ýewrokomissiýa tarapyndan geçirilýän Ýewropa sport hepdeliginiň resmi hyzmatdaşy bolup çykyş edýär.
