Gurban Berdiýew ýewrokuboklara dolanýar. Türkmen tälimçisiniň ýolbaşçylyk edýän «Turan Towuz» topary häzirki möwsümde Azerbaýjanyň çempionatynyň netijeleri boýunça, iň bolmanda, üçünji orny özüne kepillendirdi we Konferensiýa ligasynda çykyş etse gerek.
Ýekşenbe güni, 10-njy maýda, «Turan» öz meýdançasynda Azerbaýjanyň çempionatynyň 31-nji tapgyrynyň duşuşygynda «Karwany» 1:0 hasabynda utdy. Berdiýewiň topary indi üçünji orundan aşak düşmez, ýöne ikinji orunda barýan «Karabahy» yzda galdyrmak üçin entek teoretik mümkinçilikleri bar. Möwsümiň tamamlanmagyna iki tapgyr galanda, «Karabah» «Turandan» 4 utuk öňde barýar. Çempionlygy bolsa möhletinden ir «Sabah» topary kepillendirdi.
«Meniň Azerbaýjandaky üstünligim karýeramda aýratyn orun eýeleýär. Sebäbi bu iki ýylyň dowamynda biz iň aşaky derejeden başlap, häzirki derejä çenli ýetdik — biz ýewrokuboklara barýarys. Klubuň prezidenti düzümi güýçlendirmek wezipesini goýdy. Biz futbolçylary çagyrmak üçin dürli ýollary gözleýäris. Oýunçylary çagyranyňda, olar ilki bilen klubuň ýewrokuboklarda oýnaýandygyna ýa-da oýnamaýandygyna seredýär. Indi bu iş aňsat bolar» – diýip, Berdiýew belledi.
Ýatlap geçsek, Berdiýewiň ýolbaşçylygynda Russiýanyň «Rubin» topary ýurduň çempiony (2008, 2009), Kubogynyň (2011/12) we Superkubogynyň (2010, 2012) eýesi boldy, «Rostow» bolsa Russiýanyň çempionatynyň kümüş baýragyna (2015/16) mynasyp boldy. Onuň tälimçiligindäki iki topar hem ýewrokuboklarda çykyş etdi.
