34 ýaşly Mari-Luize Eta Berliniň «Union» futbol klubunyň baş tälimçisi boldy. Ol bu wezipede pes netijeler sebäpli işinden boşadylan Şteffen Baumgarty çalyşdy.
Eta Bundesliganyň galan bäş tapgyrynda «Union» bilen işleşer. Möwsüm tamamlanandan soň bolsa, ol klubuň zenanlar toparynyň baş tälimçisi wezipesine geçer.
Hünärmen 2023-nji ýyldan bäri «Unionyň» ulgamynda işläp gelýär. Şol wagt ol 19 ýaşyna çenli erkekler toparynyň baş tälimçisiniň kömekçisi wezipesini eýeläpdi.
Häzirki wagtda «Union» Germaniýanyň çempionatynyň ýaryş jedwelinde 11-nji orunda barýar.
«Sports» neşiriniň ýazmagyna görä, Mari-Luize Eta Ýewropanyň taryhda bäş sany öňdebaryjy futbol çempionatlarynyň birinde (Germaniýa, Angliýa, Ispaniýa, Italiýa ýa-da Fransiýa) erkekler toparyna ýolbaşçylyk eden ilkinji zenan boldy.
«Deutsche Welle» neşiriniň belleýşi ýaly, mundan ozal zenanlar erkekler toparlary bilen diňe aşaky diwizionlarda işleşipdi. Mysal üçin, üçünji ligada çykyş edýän Germaniýanyň «Ingolştadt» klubuna 2024-nji ýyldan bäri Sabrina Wittman tälim berýär. Fransiýanyň ikinji diwizionyndaky «Klermon» toparyna bolsa 2014–2017-nji ýyllar aralygynda Korin Dýakr ýolbaşçylyk edipdi.
