18-nji dekabrda Türkmenistanyň Halk Maslahatynyň Başlygy Gurbanguly Berdimuhamedow «Nicklaus Сompanies» kompaniýasynyň ýolbaşçysy Jon Riz bilen duşuşdy. Bu barada “Watan” habarlar gepleşiginde habar berildi.
Duşuşygyň dowamynda Gurbanguly Berdimuhamedow Türkmenistanyň «Nicklaus Сompanies» kompaniýasy bilen hyzmatdaşlyk etmekde oňyn tejribe toplandygyny aýdyp, Aşgabat şäherinde gurlan we halkara standartlaryna laýyk gelýän, paýtagtymyzyň ýaşaýjylarynyň we myhmanlarynyň arasynda meşhur bolan döwrebap golf klubunyň taslamasyny bu hyzmatdaşlygyň aýdyň mysaly hökmünde görkezdi. Bu taslama Türkmenistanda golfy ösdürmekde möhüm ädim boldy.
Türkmen halkynyň Milli Lideri sport infrastrukturasyny ösdürmekde Türkmenistan bilen «Niklaus Сompanies» kompaniýasynyň arasynda özara bähbitli hyzmatdaşlyk üçin uly mümkinçilikleriň bardygyny belläp, kompaniýanyň golf meýdançalarynyň taslamasyny düzmek we gurmak boýunça alyp barýan işleriniň «Awaza» milli syýahatçylyk zolagynda öz beýanyny tapjakdygyna hem-de ony ösdürmekde möhüm orna eýe boljakdygyna ynam bildirdi. Bellenilişi ýaly, munuň özi Awazany ýurdumyzyň öňdebaryjy dynç alyş we sport merkezine öwürmekde nobatdaky ädim bolar.
Işewür Türkmenistanda sport ulgamyny, hususan-da, golf sportuny ösdürmäge uly üns berilýändigini belläp, ýolbaşçylyk edýän kompaniýasynyň bu ugurda hyzmatdaşlygy dowam etdirmäge hemişe ygrarlydygyny tassyklady.
