Grafiki çip öndürijisi Nvidia Corp. dolandyryş hili boýunça iň gowy amerikan kompaniýalarynyň reýtinginde birinji orny eýeledi. Bu reýting The Wall Street Journal neşiri üçin Klermont uniwersitetiniň Draker instituty tarapyndan düzüldi.
Ilkinji bäşlikde öňdebaryjynyň yzyndaky orunlary beýleki iri tehnologiýa kompaniýalary eýeledi. Geçen ýylky lider Apple Inc. ikinji orna düşdi, Microsoft Corp. bolsa üçünji ornuny saklady. Sekizinji orundan dördünji orna Alphabet Inc. çykdy, Amazon.com Inc. bolsa on dokuzynjy orundan bäşinji orna geçdi.
Draker institutynyň uly ylmy işgäri Deniel Martin tehnologiýa pudagynyň has uly we has üstünlikli kompaniýalarynyň täze tehnologiýalaryň artykmaçlyklaryndan peýdalanmagy we täze işgärleri çekmegi beýleki kompaniýalardan has gowy başarandygyny belledi.
Şol bir wagtyň özünde, IT kompaniýalarynyň ählisi reýtingde üstünlik görkezmedi. Ilkinji ýigrimilikde geçen ýylky on bir kompaniýa bilen deňeşdirilende sekiz kompaniýa galdy. Hususan-da, Intel Corp. dördünji orundan 25-nji, Adobe Inc. bolsa dokuzynjydan 28-nji orna düşdi.
Şeýle-de, dolandyryş hili ýokary bolan kompaniýalaryň onlugyna Mastercard Inc., Procter & Gamble Co., International Business Machines, Johnson & Johnson we Caterpillar hem girdi.
Reýting düzülende 668 kompaniýa seljerildi we olara müşderileriň kanagatlylyk derejesi, täze işgärleri çekmek, innowasiýalar, maliýe durnuklylygy ýaly 34 görkeziji boýunça baha berildi.
