Ýeňilmedik amerikaly boksçy, bäş agram derejesinde dünýä çempiony Terens Krouford professional karýerasyny tamamlaýandygyny resmi taýdan mälim etdi.
Türgen Bütindünýä boks assosiasiýasynyň (WBA), Bütindünýä boks guramasynyň (WBO), Halkara boks federasiýasynyň (IBF) we The Ring žurnalynyň titullarynyň eýesi bolmak bilen, 38 ýaşynda boksdan gidýär.
Türgen öz gelen netijesini wideo ýüzlenmesinde aýtdy.
«Beýikligime gidýärin, indi subut eder ýaly zat galmady. Her bir boksçy bu pursatyň geljekdigini bilýär. Ýöne haçandygyny hiý kim bilmeýär…» — diýmek bilen, Krouford şu derejä ýetiren garşydaşlaryna we ynam bildiren muşdaklaryna minnetdarlyk bildirdi.
Terens Krouford professional ringde ilkinji gezek 2008-nji ýylda çykyş etdi. Karýerasynyň dowamynda ýeňil agramda çempion, birinji ýarym orta, ýarym orta we ikinji orta agramlarda absolýut çempion, şeýle-de birinji orta diwizionda titulyň eýesi boldy. Boksçynyň hasabynda 42 ýeňiş bolup, olaryň 31-isi nokaut bilen tamamlandy. Ol ýekeje gezek hem ýeňilmedi.
2025-nji ýylyň sentýabrynda Krouford emin agzalarynyň biragyzdan karary bilen Saul «Kanelo» Alwaresden üstün çykdy. Ýakynda Bütindünýä boks geňeşi (WBC) Kroufordy bu söweş üçin 300 müň dollar möçberde komissiýa tölegini tölemändigi sebäpli tituldan mahrum etdi.
