Italiýaly derwezeban Janluiji Donnarumma geçen möwsümiň iň gowy derwezebany hökmünde FIFA-nyň The Best baýragynyň eýesi boldy. Bu barada guramanyň resmi saýtynda habar berildi.
Häzirki wagtda «Mançester Sitide» çykyş edýän derwezeban bu baýragy 2024-nji ýylyň 11-nji awgustyndan 2025-nji ýylyň 2-nji awgusty aralygyndaky ajaýyp çykyşlary üçin aldy. Bu döwürde ol Fransiýanyň «Pari Sen-Žermen» klubunyň düzüminde dört kubok utdy: Çempionlar ligasy, Fransiýanyň çempionaty, şeýle-de ýurduň Kubogy we Superkubogy.
Bu kategoriýada ýeňiji milli ýygyndylaryň kapitanlarynyň we baş tälimçileriniň, žurnalistleriň we janköýerleriň ses bermegi arkaly kesgitlenýär.
Ýylyň iň gowy derwezebany adyna dalaşgärleriň arasynda şu aşakdakylar hem bardy:
- Alisson Bekker («Liwerpul», Braziliýanyň milli ýygyndysy)
- Tibo Kurtua (Madridiň «Realy», Belgiýanyň milli ýygyndysy)
- Emiliano Martines («Aston Willa», Argentinanyň milli ýygyndysy)
- Manuel Noýer («Bawariýa», Germaniýanyň milli ýygyndysy)
- Dawid Raýýa («Arsenal», Ispaniýanyň milli ýygyndysy)
- Ýan Zommer («Inter», Şweýsariýanyň milli ýygyndysy)
- Woýseh Şçensny («Barselona», Polşanyň milli ýygyndysy)
