Halkara futbol federasiýasy (FIFA) Ýewropa klublarynyň assosiasiýasy bilen bilelikde 2029-njy ýylda geçiriljek klublaryň arasyndaky dünýä çempionatyna gatnaşyjylaryň sanyny 32-den 48-e çenli artdyrmak mümkinçiligi üstünde işleýär. Bu barada The Guardian neşiri habar berýär.
Neşiriň maglumatyna görä, ara alyp maslahatlaşmalar ýaryşyň soňky ýeňijisi «Çelsiniň» takmynan 84 million funt sterling gazanmagyndan soň başlandy. Ýewropanyň iri klublary saýlama tapgyra gatnaşmak mümkinçiliklerini ýokarlandyrmak üçin gatnaşyjylaryň sanyny artdyrmagy teklip etdiler.
Klublaryň arasyndaky geçen dünýä çempionatynda Angliýanyň, Ispaniýanyň we Italiýanyň çempionlary — «Liwerpul», «Barselona» we «Napoli» çykyş etmediler. Hereket edýän saýlama ulgamy Çempionlar ligasynyň soňky dört ýeňijisiniň we UEFA-nyň iň ýokary koeffisiýentine eýe bolan sekiz klubuň gatnaşmagyny göz öňünde tutýardy, şol bir wagtyň özünde bir ýurtdan ikiden köp toparyň gatnaşmagyna rugsat berilmeýärdi.
Indi köpçülikleýin habar beriş serişdeleriniň maglumatlaryna görä, FIFA bir ýurtdan bolan klublaryň sanyna goýlan çäklendirmäni ýatyrmak mümkinçiligini ara alyp maslahatlaşýar. Şeýle bolan halatynda, UEFA-nyň reýtinginiň liderleriniň hataryna girýän Angliýanyň Premýer-ligasynyň wekilleri, hususan-da «Arsenal», «Liwerpul» we «Mançester Siti» ýaly toparlar gatnaşmak üçin goşmaça mümkinçilik alyp bilerler.
