Spotify aýdym-saz hyzmatynyň işinde uly tehniki näsazlyk bolup geçdi, bu bolsa dünýäniň ähli ýerlerinden ulanyjylaryň köpçülikleýin şikaýat etmegine getirdi.
Downdetector saýtynyň maglumatlaryna görä, näsazlyklar baradaky habarlaryň iň ýokary derejesi Aşgabat wagty bilen 19:30-da boldy. Şol wagta çenli 36 müň töweregi şikaýat gelip gowuşdy. Olaryň esasy bölegi (33 müň) ABŞ-dan ulanyjylaryň paýyna düşýär. Şeýle-de, meseleler barada Kanadadaky, Beýik Britaniýadaky, Germaniýadaky, Fransiýadaky, Italiýadaky, Meksikadaky, Ýaponiýadaky, Braziliýadaky we beýleki birnäçe ýurtlardaky ulanyjylar habar berdi.
Downdetector-yň maglumatlaryna görä, ulanyjylaryň aglabasy (80%) programmada we kontenti diňlemekde näsazlyklaryň bolmagyndan zeýrendi. Habarlaryň 11%-i awtorizasiýa, 9%-i bolsa hyzmatyň web-saýtynyň işindäki bökdençlikler bilen baglanyşykly.
Spotify dünýäniň ähli ýerlerinden awtorlaryň aýdymlaryny, podkastlaryny we wideolaryny diňlemek hem görmek üçin iň uly hyzmatlaryň biridir. 2025-nji ýylyň başyndaky ýagdaýa görä, platformanyň aýda, takmynan, 675 million işjeň ulanyjysy bolup, olardan 263 million töweregi tölegli ulanyjylardyr.
