Arheologlar Nil deltasyndaky gadymy Tanis şäherinde ýerleşýän şa mazaryndan 225 sany jaýlamak üçin niýetlenen heýkeljik tapdylar. Bu artefaktlaryň ýüzündäki nyşanlar atsyz sarkofagda ýatan merhumyň şahsyýetini anyklamaga mümkinçilik berdi: ol faraon Şeşonk III bolup çykdy.
Tanisdäki fransuz ekspedisiýasyna ýolbaşçylyk edýän müsürşynas Frederik Peýrodo barlagyň netijelerini mälim etdi. Ol in situ (öz ýerinde) jaýlanýan heýkeljikleriniň 1946-njy ýyldan bäri Tanis nekropolynda ilkinji gezek tapylandygyny aýtdy.
Peýrodo şeýle tapyndylary aýratyn seýrek duş gelýän tapyndy diýip atlandyrýar. Ol olaryň hatda Patyşalar jülgesinde hem şeýle ýagdaýda tapylmaýandygyny belleýär. 1922-nji ýylda açylan Tutanhamonyň mazary, aýratyn ýagdaýdyr.
Bu heýkeljikler 9-njy oktýabrda ir bilen uly, ýöne atsyz sarkofagyň ýerleşýän dar mazarynyň gazuw-agtaryş işleri mahalynda tapyldy. Topar olary örän seresaply aýyrdy, şonuň üçin iş 10 gün dowam etdi.
Uly bolmadyk ýaşyl heýkeljikler trapesiýa görnüşli çukuryň diwarlarynyň ugrunda “ýyldyz” şekilinde goýlupdyr, beýlekileri bolsa aşaky böleginde hatar-hatar bolup ýatyrdy. Bu heýkeljikler merhumy ahyrýetde ýakynyna ýoldaş boljak simwoliki “gullukçylar” hasaplanypdyr. Peýrodo tapylan heýkeljikleriň ýarysyndan gowragynyň aýal şekilindäki heýkeljikler bolandygyny we munuň örän seýrekdigini sözüniň üstüne goşdy.
