Mercedes-Benz ilkinji gezek robototaksi bazaryna girýär. Nemes konserni BAE-niň (Birleşen Arap Emirlikleriniň) Abu-Dabi şäherinde sürüjisiz (awtomatiki) taksini işe girizmegi meýilleşdirýär. Taslama Hytaýyň programma üpjünçiligini işläp taýýarlaýyş kompaniýasy bolan "Momenta Global" bilen hyzmatdaşlykda durmuşa geçirilýär.
Tanyşdyrylyşy ýanwar aýyna meýilleşdirilen täzelenen "Mercedes-Benz S-klas" sedanlary hyzmat üçin esasy ulag hökmünde saýlandy. Kaşaň awtoulag dördünji derejeli awtomatiki dolandyryş ulgamy bilen üpjün ediler. Bu tehnologiýa sürüjiniň yzygiderli gözegçiligini talap etmezden, ýol ýagdaýlarynyň köpüsinde awtoulagyň özbaşdak işlemegine mümkinçilik berýär.
Awtonom sürüjilik ulgamyny ornaşdyrmak BAE-niň çäginde pilotsyz ulaglary ulanmaga rugsady bolan "Lumo Mobility" kompaniýasynyň kömegi bilen amala aşyrylýar.
Abu-Dabidäki bu synag taslamasy "Mercedes-Benz" üçin täze MB.OS programma üpjünçiligini ulanmakda meýdança bolup hyzmat eder. Bu ulgam esasy operasion ulgama gözegçiligi saklamak bilen bir hatarda, ýöriteleşdirilen komponentleri döretmäge daşarky işläp düzüjileri çekmäge mümkinçilik berer.
Mercedes-Benz-iň hyzmatdaşy, 2016-njy ýylda esaslandyrylan "Momenta Global", pilotsyz awtoulaglar üçin programma üpjünçiliginiň öňdebaryjy hytaý işläp düzüjilerinden biridir. Kompaniýa eýýäm Hytaýda "BMW" üçin öz ulgamlaryny üpjün edýär we 2026-njy ýylda Germaniýada "Uber" bilen robototaksini işe girizmäge taýýarlanýar.
"Uber" hyzmaty noýabr aýynyň ahyrynda Abu-Dabide salonda operatory bolmadyk, doly awtonom taksileri ulanmaga eýýäm başlady. Bu taslamada "Uber"-iň hyzmatdaşy başga bir hytaý firmasy – "WeRide" bolup durýar.
