Daşary işler ministrliginde Türkmenistan bilen Serbiýanyň arasyndaky gatnaşyklary giňeltmek boýunça gepleşikler geçirildi. Geňeşmeler Türkmenistanyň daşary işler ministriniň orunbasary Ahmet Gurbanow bilen Serbiýanyň halkara ykdysady hyzmatdaşlyk ministri Nenad Popowiçiň arasynda boldy.
Türkmen daşary syýasat edarasynyň metbugat gullugynda habar berlişi ýaly, serb ministri Türkmenistanyň Bitaraplygynyň 30 ýyllygyna we Halkara Bitaraplyk gününe bagyşlanan çärelere gatnaşmak üçin Aşgabada geldi.
Taraplar ikitaraplaýyn gün tertibiniň esasy meseleleri boýunça netijeli pikir alyşdylar we syýasy-diplomatik dialogyň häzirki derejesine baha berdiler. Söhbetdeşler ikitaraplaýyn ykdysady gatnaşyklar üçin birnäçe geljegi uly ugurlary: söwda, dokma we gurluşyk senagaty, şeýle hem polimerleriň, dökünleriň we oba hojalyk önümleriniň eksportyny kesgitlediler.
Söwda-ykdysady hyzmatdaşlygy ösdürmek maksady bilen, taraplar bilelikdäki Hökümetara topary döretmek mümkinçiligine seretdiler.
Gepleşikleriň gatnaşyjylary halkara platformalarda, aýratyn-da, BMG-niň çäklerinde özara hereket etmegiň tejribesine ýokary baha berdiler. Bu ýerde ýurtlar özara goldaw berýärler we möhüm halkara başlangyçlara awtorlyk edýärler. Ahyrky netijede, taraplar özara bähbitlere laýyk gelýän miweli hyzmatdaşlygy diwersifikasiýa etmek üçin dialogy dowam etdirmegiň zerurlygyny nygtadylar.
