Billi Aýlişiň YouTube kanalynda «Hit Me Hard And Soft: The Tour (Live In 3D)» dokumental filminiň treýleri peýda boldy. Onuň kinoteatrlarda premýerasy 20-nji martda bolar.
Film aýdymçynyň «Hit Me Hard And Soft» albomyny goldamak üçin dünýäniň dürli ýerlerinde beren konsertlerine bagyşlanýar. Filmiň režissýory Jeýms Kemeron («Titanik», «Awatar») boldy.
Treýler 2024-nji ýylyň 29-njy sentýabryndan 2025-nji ýylyň 23-nji noýabry aralygynda geçen konsert syýahatynyň perde aňyrsyny görkezýär. Bu Aýlişiň ýedinji we dogany hem prodýuseri Finneasyň gatnaşmazlygynda ilkinji konsert syýahaty boldy. Wideoda artistiň onuň ýoklugyna gynanýandygy, şeýle-de yzygiderli çykyşlar sebäpli fiziki agyrylar we ýadawlyk bilen nähili göreşýändigi görkezilýär.
Mundan başga-da, wideoda syýahatynyň dowamynda aýdymçynyň ýanynda bolup, oňa ruhy goldaw beren güjükleri bilen kadrlar bar.
«Hit Me Hard And Soft: The Tour» konsert syýahaty Demirgazyk Amerikada, Awstraliýada, Ýewropada, Birleşen Patyşalykda, Irlandiýada we Ýaponiýada 106 konserti öz içine aldy.
«Hit Me Hard and Soft» Aýlişiň üçünji studiýa albomy boldy. Şu ýyl Grammy dabarasynda albom we ondaky aýdymlar «Ýylyň albomy», «Iň gowy pop-albom», «Ýylyň aýdymy» we «Ýylyň ýazgysy» ýaly ýedi nominasiýada dalaşgär görkezildi.
