Amerikan aktýory Jonni Depp Mihail Bulgakowyň “Ussat we Margarita” (Мастер и Маргарита) romany boýunça iňlis dilinde düşüriljek filmiň prodýuseri bolar. Taslama barada Saud Arabystanynda geçirilen kinofestiwalda aýdyldy diýip, Variety habar berýär.
Filmi döretmegiň üstünde Deppiň IN.2 Film kinostudiýasy işlär. Aktýor filmde rollaryň birini ýerine ýetirip biler, ýöne hut haýsy keşpde oýnajakdygy entek belli däl.
Şeýle-de, filmiň prodýuserleri bolup Swetlana Migunowa-Dali we Greýs Lo çykyş eder. Olar 2017-nji ýylda romany ekrana geçirmek üçin hukuk satyn aldy. Plot telegram-kanalynyň maglumatlaryna görä, hut şu sebäpli ýakynda Mihail Lokşiniň rus ekranlaşdyrmasy ABŞ-da we Beýik Britaniýada görkezilmedi.
Taslamanyň entek režissýory ýok, aktýorlar düzümi-de yglan edilmedi. Filmi 2026-njy ýylyň ahyrynda düşürip başlamak meýilleşdirilýär.
Depp bu işe “Žanna Dýubarri” filminiň topary bilen bilelikde ýolbaşçylyk eder. Bu Bulgakowyň romanynyň iňlis dilinde ilkinji wersiýasy bolar.
Häzir Depp Paramount studiýasynyň “Roždestwo hekaýasy” filmi bilen meşgul. Onuň premýerasy 2026-njy ýylyň güýzüne meýilleşdirilýär.
