2025-nji ýylyň 8-nji dekabrynda (Aşgabat wagty bilen 9-njy dekabrda 03:26) SpaceX kompaniýasy Group 6-92 missiýasyny ýerine ýetirmek bilen, Starlink hemralarynyň täze toplumyny üstünlikli uçurdy. Floridadaky Kennedi kosmodromyndan uçuryş Falcon 9 raketasynyň B1067 belgili birinji basgançagynyň 32-nji uçuşy boldy we bu yzyna gaýtarylýan basgançaklary gaýtadan ulanmagyň sany boýunça täze rekorddyr.
Raketa Ýere golaý orbita 29 sany Starlink 2.0-mini hemrasyny çykardy. Uçuş ýaramaz howa şertleri we tehniki barlaglar sebäpli birnäçe gün yza süýşürildi.
Birinji basgançak B1067 uçuşdan sekiz minutdan soň Atlantik ummanyndaky Just Read the Instructions (JRTI) ýüzýän platformasyna gaýdyp geldi.
SpaceX bu uçuşyň orbita 12 000-den gowrak hemrany çykarmak boýunça uly meýilnamanyň bir bölegi bolandygyny belledi. Starlink 2.0-mini hemralary aragatnaşyk üçin kämilleşdirilen lazer geçirijileri, şeýle-de mobil gurluşlara göni birikmek ulgamlary bilen enjamlaşdyryldy. Kompaniýa basgançaklary 40 gezege çenli gaýtadan ulanmaga ymtylýandygyny aýtdy.
Häzirki uçuş şu ýylda Falcon 9-yň 158-nji uçuşy we 2017-nji ýyldan bäri birinji basgançagyň 510-njy gezek gaýtadan uçuşy boldy. 2025-nji ýylyň 7-nji dekabrynda hem SpaceX Kaliforniýadaky Wandenberg bazasyndan 29 Starlink hemrasyny uçurypdy.
