Jakarta dünýäniň iň gür ilatly şäheri bolup, Tokiony birinji orundan gysyp çykardy. Indoneziýanyň paýtagtynda 42 mln adam ýaşaýar, bu bolsa beýleki şäherleriň görkezijilerinden köpdür diýip, BMG-niň soňky gözlegine salgylanyp, The Guardian habar berýär.
Reýtingde ikinji orny 37 mln adam bilen Bangladeşiň paýtagty Dakka eýeledi. Gözlegde üç goňşy prefektura bilen bir sebit hökmünde görülýän Tokio 33 mln ýaşaýjy bilen üçünji orunda ýerleşdi. Orunlaryň şeýle paýlanyşy BMG-niň 2018-nji ýyldaky hasabatyndan düýpli tapawutlanýar. Şol wagt ýapon paýtagty 37 mln bilen öňdebaryjy bolupdy.
Şäherleriň tertibindäki üýtgemeler şäher, şäherçe we oba ýerleriniň bir umumy klassifikasiýasyny üpjün edýän täze hasaplama usulynyň ulanylmagy bilen baglanyşyklydyr.
Maglumatlar şäherleşmegiň okgunly depginde ösýändigini görkezýär: şäher ýaşaýjylarynyň sany 1950-nji ýyldan bäri iki esseden gowrak ýokarlandy. Olar şol wagt Ýeriň 2,5 mlrd ilatynyň 20%-ini emele getirýän bolsa, häzir şäher ýaşaýjylary planetanyň 8,2 mlrd ýaşaýjysynyň tas ýarysyny düzýär.
Dünýäniň iň gür ilatly 10 şäherinden dokuzysy Aziýada ýerleşýär: bu Jakarta, Dakka, Tokio, Nýu-Deli, Şanhaý, Guançžou, Kair, Manila, Kalkutta we Seul.
