Režissýor Kwentin Tarantino "Açlyk oýunlary" (The Hunger Games) franşizasynyň 1999-njy ýylda çykan "Şa söweşi" (Battle Royale) atly ýapon romanyndan we onuň film adaptasiýasyndan göçürilip alnandygyny (plagiatdygyny) öňe sürdi diýip, "The Hollywood Reporter" neşiri habar berýär.
Onuň pikirine görä, Kosýun Takaminiň kitabynyň ýordumy "Açlyk oýunlarynyň" awtory Sýuzanna Kollins tarapyndan tutuşlygyna diýen ýaly sözme-söz göçürilipdir. Tarantino ýazyjynyň ogurlan pikirleri üçin näme üçindir entegem kazyýet jogapkärçiligine çekilmändigine geň galýandygyny aýtdy.
"Olar kitabyň tutuş manysyny ogurlapdyrlar. Akmak kitap tankytçylary 'Şa söweşi' ýapon filmini görmändirler, şonuň üçin hem munuň üsti açylman galypdyr. Filmi gören kino tankytçylary bolsa: 'Bu edil Şa söweşidä!' diýdiler" diýip, režissýor düşündirdi.
Şeýle hem, ol "Şa söweşini" iň söýgüli filmleriniň hataryna goşdy.
Iki eseriň arasyndaky meňzeşlikler baradaky gürrüňler baryp 2012-nji ýylda, "Açlyk oýunlary" franşizasynyň ilkinji filmi çykanda başlady. "Şa söweşi" Ýaponiýadaky antiutopik geljek barada gürrüň berýär, bu ýerde mekdep okuwçylarynyň topary howply diri galmak oýnuna gatnaşmaga mejbur edilýär. "Açlyk oýunlarynyň" mazmuny hem şuňa meňzeş wakanyň töwereginde aýlanýar: Panem atly toslanyp tapylan ýurtda ýetginjekler ölüm howply söweşe gatnaşmak üçin tötänden saýlanyp alynýar. Awtory Sýuzanna Kollins başda munuň plagiatdygyny ret etdi. Ýazyjy zenan "Şa söweşi" ýapon eseriniň ýordumy bilen tanyş däldigini we "Açlyk oýunlarynyň" üstünde işleýärkä kitaby okamakdan ýüz öwrendigini aýtdy.
