Türkmenistanyň senagat we gurluşyk önümçiligi ministri Toýguly Nurowyň ýolbaşçylygyndaky wekiliýet Birleşen Milletler Guramasynyň Senagat Ösüşi Guramasynyň (ÝUNIDO) 21-nji Baş konferensiýasynyň işine gatnaşdy. Türkmenistanyň Daşary işler ministrliginiň habar bermegine görä, bu sammit 23–27-nji noýabr aralygynda Er-Riýadda (Saud Arabystany) geçdi.
Baş konferensiýada hökümet düzümlerinden, hususy pudakdan we raýat jemgyýetinden bolan wekiliýetler senagat ösüşiniň ählumumy kynçylyklary, şol sanda howanyň üýtgemegi, azyk ýetmezçiligi we dünýä ýurtlaryna we işgärlerine deň peýda getirýän üpjünçilik zynjyrlaryny döretmek ýaly meseleleri çözmäge nähili kömek edip biljekdigini ara alyp maslahatlaşdylar, diýip BMG-niň resmi saýty habar berdi.
Konferensiýa gatnaşyjylar UNIDO-nyň indiki iki ýyldaky işini kesgitlejek kararlary kabul etdiler.
Çäräniň çäginde Toýguly Nurow Gazagystanyň senagat we gurluşyk ministri Ýersaýyn Nagaspaýew bilen duşuşyk geçirdi. Gepleşiklerde esasy üns senagatdaky, hususan-da, metallurgiýa, maşyn gurluşygy we gurluşyk materiallaryny öndürmekdäki hyzmatdaşlygy giňeltmegiň ähmiýetine çekildi. Söhbetdeşler iki ýurtda öndürilýän gurluşyk materiallarynyň eksportyny we importyny artdyrmak mümkinçiliklerini ara alyp maslahatlaşdylar.
Türkmenistanyň Senagat ministrliginiň ýolbaşçysy ýurduň sement zawodlarynda birnäçe görnüşli ýokary hilli sement önümleriniň öndürilýändigini belläp, olaryň görnüşlerini hödürledi we eksport mümkinçilikleri barada gürrüň berdi. Nurow şeýle hem "Türkmen aýna önümleri" atly aýna önümçilik zawodynyň işi barada maglumat berdi.
