Režissýor Jeýms Kemeron Netflix-iň filmleriniň «Oskar» baýragyna gatnaşmaly däldigini aýtdy. Ol öz pikiri bilen «The Town with Matt Belloni» podkastynda paýlaşdy.
«Awatar» we «Titanik» filmleriniň režissýory Netflix-iň filmleri diňe akademiýanyň düzgünlerine laýyk gelmek üçin gysga möhletleýin çäkli kinoprokata goýbermek tejribesini tankytlady. Ýagny, studiýa «Oskara» dalaşgär görkezilmek üçin öz filmlerini kinoteatrlarda bir hepdelik ýa-da 10 günlük çykarýar. Režissýor bu tejribäni oýnatgylar üçin aldawaç diýip hasaplaýar we ony “düýbünden çüýrük” diýip atlandyrýar.
«Film kinoprokat üçin film hökmünde döredilmeli we eger «Oskar» baýragy teatr prokatyny aňlatmaýan bolsa, ol meniň üçin hiç zat aňlatmaýar» – diýip, režissýor aýtdy.
Kemeronyň pikiriçe, Netflix öz strategiýasyny üýtgedip, filmleri bir aýlyk azyndan 2000 kinoteatrda giň prokata goýberen ýagdaýynda baýraga dalaş etmeli.
Soňky ýyllarda Netflix-iň birnäçe uly taslamalary, şol sanda «Roma», «It hökmürowanlygy» we «Irlandiýaly» esasy kategoriýada «Oskar» baýragyna dalaşgär görkezildi. Ilkinji iki filmiň režissýorlary Alfonso Kuaron we Jeýn Kempion iň gowy režissýorlyk üçin baýrak aldy.
Habar Netflix-iň Warner Bros. Discovery-nyň studiýasyny we striming biznesini satyn almak mümkinçiligini öwrenýändigi baradaky gürrüňleriň ýaýran wagty peýda boldy. Metbugatda Netflix Inc.-iň, ilkinji nobatda, studiýanyň “Garri Potter” we DC Comics ýaly franşizalaryna gyzyklanma bildirmek bilen, bu mümkinçiligi seljermek üçin maliýe geňeşçisini işe alandygy habar berilýär.
