Paramount studiýasy komediýa görnüşli «Dykyn wagty» («Час пик») uruşly filminiň dördünji bölümini çykarmak barada şertnama baglaşdy. Täze filmiň režissýory franşizanyň öňki bölümleriniň ählisini düşüren Brett Retner bolar.
Deadline neşiriniň maglumatlaryna görä, Paramount Warner Bros. kompaniýasynyň adyndan taslamanyň prokaty bilen meşgullanar we munuň üçin kassa girdejisinden iki belgili göterim alar.
Bu kompaniýalaryň Paramount Dewid Ellisonyň gözegçiligine geçeni bäri ilkinji hyzmatdaşlygy boldy.
Dördünji bölümde öz keşplerine Jeki Çan bilen Kris Taker gaýdyp geler.
Ozal Semafor neşiri ABŞ-nyň Prezidenti Donald Trampyň hut özüniň 90-njy ýyllaryň şeýle žanrdaky uruşly filmlerini gowy görýändigi we «Dykyn wagty» filmini žanryň iň gowy nusgalarynyň biri hasaplaýandygy üçin franşizany dikeltmek pikirini öňe sürendigini habar berdi. KHBS onuň degişli teklip bilen Ellisonlaryň maşgalasyna ýüz tutandygyny ýazdy.
«Dykyn wagty» seriýasynyň üç filmi jemi 850 mln dollar gazandy. Franşiza gonkongly polisiýa işgäri Li we FBI agenti Jeýms Karter barada gürrüň berýär. Birinji bölümde olar Los-Anjelesde hytaý konsulynyň gyzynyň ogurlanmagyny derňeýär. Ikinji bölümde gahrymanlar Gonkonga ugraýar we triada bilen ýüzbe-ýüz bolýar. Üçünji filmde waka Parižde bolup geçýär, bu ýerde olar güýçli jenaýat sindikatyna garşy durýar.
