Türkmenistanyň we Gazagystanyň arasyndaky oba hojalyk toplumynyň haryt dolanyşygy dokuz aýda $103 million dollara ýetdi. Ösüş 37,5% boldy diýip, Orient Gazagystanyň Oba hojalygy ministrliginiň maglumatlaryna salgylanyp habar berýär.
Bu barada maglumat 24-nji noýabrda Astanada, Türkmenistanyň Prezidentiniň Gazagystana döwlet saparynyň çäklerinde geçirilen gepleşikleriň dowamynda hödürlenildi. Türkmenistanyň oba hojalygy ministri Çaryýar Çetiýew gazak kärdeşi Aýdarbek Saparow bilen oba hojalygy pudagynda häzirki gatnaşyklary we ony giňeltmek boýunça geljekki ädimleri ara alyp maslahatlaşdy.
Aýdarbek Saparow Türkmenistanyň Gazagystan tarapyndan oba hojalyk önümlerini eksport etmek üçin esasy bazarlaryň biri hökmünde garalýandygyny we agrar pudagyň iki ýurduň hyzmatdaşlygynda görnükli orun eýeleýändigini belledi.
Gazak tarapy hyzmatdaşlygy ösdürmek boýunça teklipleri hödürledi. Olaryň arasynda bilelikdäki kärhanalary döretmek bar.
Duşuşykda maldarçylyk önümleri bilen söwdany giňeltmek üçin möhüm bolan weterinariýa we biologiki howpsuzlyk meselelerine hem üns çekildi. Ylmy institutlaryň hyzmatdaşlygyna aýratyn üns berildi: bilelikdäki barlaglary geçirmek, tejribe alyşmak we agro-senagat toplumy üçin hünärmenleri taýýarlamak meýilleşdirilýär.
Çaryýar Çetiýew Türkmenistanyň bilelikdäki taslamalary güýçlendirmäge, haryt dolanyşygyny artdyrmaga we iki ýurduň azyk howpsuzlygyny pugtalandyrmaga taýýardygyny nygtady.
