Amerikaly prodýuser R.J. Katler we fransiýaly režissýor Loran Buzero ýakynda Luwrda bolup geçen ogurlyk barada dokumental film döretmäge girişdi. Bu barada Hollywood Reporter habar berýär.
Neşir filmiň ogurlygyň özüne we oňa gatnaşan adamlaryň gözlegine bagyşlanjakdygyny belleýär. Taslama trilleriň we tru-kraýmyň elementleri bolan dokumental film hökmünde göz öňünde tutulýar. Onda derňew işleriniň gidişi barada gürrüň berler, şaýatlar, sülçüler we muzeýiň wekilleri görkeziler, şeýle-de ogurlanan şaý-sepleriň ýerleşip biljek ýeri baradaky soraga seredilip geçiler.
Gymmat bahaly şaý-sepler 2025-nji ýylyň 19-njy oktýabrynda ogurlandy. Jenaýatçylar Luwra girip, Napoleon III-niň döwrüne degişli predmetleri: broşlary, tiaralary we monjuklary aldy. Bu zatlaryň ählisine olar ýedi minut töweregi sarp etdi. Ýitgi 88 mln ýewro diýlip hasaplanýar.
Ogurlykda güman edilip, ýedi adam tussag edildi. Dördüsine günä bildirildi, galan üçüsi boşadyldy. Ogurlanan predmetler entek tapylmady.
Fransiýanyň Medeniýet ministrligi bolup geçen wakadan soň muzeýde täze howpsuzlyk serişdeleriniň gurnaljakdygyny habar berdi.
