Merkezi Aziýa döwletleri akkreditirlenen ýokary bilim edaralary tarapyndan berlen diplomlary özara ykrar etmek barada ylalaşyga gol çekdiler. Orient agentliginiň Zakon.kz portalyna salgylanyp ýazmagyna görä, resminamada sebitiň döwletleriniň, şol sanda Türkmenistanyň hem, şeýle diplomlary umumy şertlerde ykrar etmek barada ylalaşandygy aýdylýar.
Ylalaşyk, ykrarnamanyň diňe hünär derejesiniň (kwalifikasiýanyň) her bir ýurduň ýokary bilim ulgamlarynyň bellenilen talaplaryna laýyk gelmegi şertinde amala aşyryljagyny göz öňünde tutýar. Diňe görkezilen hünär talaplarynyň arasynda subut edilen we ep-esli tapawutlar bolan ýagdaýynda ykrar etmekden ýüz öwürmek mümkinçiligi döreýär.
Mundan başga-da, Özbegistan, Gyrgyzystan, Türkmenistan we Täjigistan ýaly döwletleriň şeýle diplomlara degişli ugurlar we hünärler boýunça hünär işine, okuw-hünär tejribesini (stažirovkany) geçmäge we okuwy dowam etdirmäge hukuk berýän resminamalar hökmünde garaýandygy görkezilýär.
