Awstraliýada uzak ýaşan ýaşaýjylaryň iň uly ýygnanyşygy boldy: ýurduň 100 we ondan uly ýaşly 150 ýaşaýjysy baýramçylyk saçagynyň başynda duşuşdy. Olaryň umumy ýaşy 15 müň ýyldan geçdi. Bu dabara Ginnesiň rekordlar kitabynda hasaba alyndy.
Duşuşyk Awstraliýada oktýabryň soňky ýekşenbesinde bellenilýän Mamalaryň we babalaryň gününde Täze Günorta Uelsiň parlamentinde geçirildi. Onuň guramaçysy garry adamlara we mümkinçiligi çäkli adamlara seretmek boýunça hyzmatlary hödürleýän My Guardian kompaniýasy boldy.
Bu çärä taýýarlyk bir ýyl ozal başlandy. Guramaçylara uly ýaşly köp gatnaşyjylaryň zerurlyklaryny göz öňünde tutmak gerekdi. Taýýarlyga meýletinçiler, gatnaşyjylaryň garyndaşlary we kompaniýanyň hyzmatdaşlary gatnaşdy.
Her bir ýaşaýjynyň ýaşy resmi taýdan tassyklandy. Olaryň arasynda iň garry gatnaşyjy 109 ýaşyndady.
Myhmanlaryň birinden saglygyny saklap, şeýle uly ýaşa ýetmeginiň nädip başardandygy soralanda, ol “Näme etseňizem, bar güýjüňiz bilen synanyşyň” diýip jogap berdi.
Belläp geçsek, häzirki wagtda Ýer ýüzünde iň garry adam Beýik Britaniýanyň ýaşaýjysy Etel Katerhem hasaplanýar. Ol 2025-nji ýylyň 21-nji awgustynda 116 ýaşyny doldurdy.
