Germaniýaly sazşynas 30 ýyl mundan ozal tapylan iki organ kompozisiýasynyň Iogann Sebastýan Baha (1685 – 1750) degişlidigini anyklady. Bu barada MDR teleradiokompaniýasy habar berdi.
1992-nji ýylda sazşynas Peter Wollni Brýusseliň Patyşalyk kitaphanasynda işleýän wagty “Çakona re minor” we “Çakona sol minor” aýdym-saz eserleri bilen XVII asyryň iki golýazmasyny tapdy. Ol onlarça ýylyň dowamynda bu kompozisiýalaryň Bah tarapyndan döredilendigine subutnama ýygnady.
Wollni, takmynan, 1705-nji ýylda Bahyň şägirdiniň onuň irki eserlerini göçürip alandygy baradaky pikiri öňe sürýär.
“Eserler Bahyň bu döwürdäki kompozisiýalaryna mahsus bolan we başga hiç bir kompozitoryňka meňzemeýän stilistik aýratynlyklary saklaýar” – diýip, Wollni belledi.
Indi bu iki çakona soňky 320 ýylda ikinji gezek Leýpsigdäki Keramatly Foma ybadathanasynda ýerine ýetirildi.
Iogann Sebastýan Bah barokko eýýamynyň aýdym-saz sungatynyň iň uly wekilleriniň biri hasaplanýar. Ol müňden gowrak eser döretdi we öz döwrüniň operadan başga ähli žanrlarynda diýen ýaly işledi.
