Senagat dizaýneri Abidur Çoudhuri Apple kompaniýasyndan gitdi. Ol kompaniýanyň iň soňky modelleriniň biri bolan iPhone Air-iň esasy işläp düzüjisi bolupdy diýip, 9to5mac çeşmelerine salgylanyp habar berýär.
Habar beriş serişdeleriniň maglumatlaryna görä, Çoudhuri emeli aň tehnologiýalarynyň üstünde işleýän bir startapa (ýa-da başlangyja) işe girdi. Startapyň ady mälim edilmedi.
Abidur Çoudhuri soňky üç ýylda Apple kompaniýasyndan giden birnäçe esasy dizaýnerleriň biridir. 2022-nji ýylda kompaniýadan 2019-njy ýylda meşhur Jonatan Aýwyň ýerine korporasiýanyň baş dizaýneri wezipesini eýelän Ewans Henki gitdi. 2023-nji ýylda Apple kompaniýasynda 25 ýyldan gowrak wagt işlän senagat dizaýny boýunça wise-prezident Tan Tan hem kompaniýadan gitdi. Şu ýylyň iýul aýynda bolsa, ulanyjy interfeýsiniň dizaýn toparynda 15 ýyldan gowrak işlän Saýrus Daniel hem kompaniýany terk etdi.
Şeýle işgärler çalşygynyň fonunda Apple täze iPhone modelleriniň satuwy arkaly Hytaý bazaryndaky ornuny bölekleýin berkitmegi başardy. Counterpoint-iň maglumatlaryna görä, Hytaýda Apple-iň smartfonlarynyň satuwy oktýabr aýynda, geçen ýylyň degişli aýy bilen deňeşdirilende, 37% artdy. Kompaniýanyň bazardaky paýy, geçen ýylyň şol bir döwri bilen deňeşdirilende, 25%-e çenli ýetdi. Seljerijiler satuwyň ösüşini iPhone 17-ä bolan ýokary isleg bilen baglanyşdyrýarlar, ol öňki model iPhone 16-a bolan islegden ep-esli ýokarydy.
