Dubaýdaky Julith Coffee kafesinde bir çaşka üçin 3600 dirham (980 dollar) bahadan kofe peýda boldy diýip, The Independent habar berýär.
Bu içgi günbatar Panamadaky Baru wulkanynyň eňňitlerinde ösdürilip ýetişdirilýän seýrek görnüş bolan Nido 7 toplumynyň Geisha kofe dänelerinden taýýarlanýar. Bu mikrolotuň aýratynlygy her bir toplumyň tutuş hasyl möwsümi üçin bary-ýogy birnäçe kilogram däne bermegidir.
Julith Panamadaky auksionda 20 kilogram Nido 7 dänesini satyn alyp bildi. Söwdada ýiti göreş gitdi. Baha 549 teklipden soň 2,2 mln dirhama (600 müň dollara) ýetdi, bu hem Nido 7-ni taryhda iň gymmat kofe toplumyna öwürdi.
Indi kafede 400 çaşka töweregi içgi taýýarlamak meýilleşdirilýär. Olardan birini Dubaý emirliginiň hökümdary – şeýh Mohammed bin Raşid Al Maktum üçin taýýarlamak göz öňünde tutulýar.
“Nido 7 Geisha – bu ajaýyp kofe bolup, ony ýer ýüzünde diňe ýek-tük adam dadyp biler we indi bu ilkinji gezek Dubaýda mümkin boldy. Onuň azdygy üçin, her bir çaşka taryhyň bir bölejigi ýaly duýulýar. Meniň üçin onuň Alyhezretleri şeýh Mohammed üçin bir çaşka gaýnatmak uly hormat bolardy” – diýip, kafede esasy roster Serkan Sagsoz belledi.
